美洲國家盃C組首輪聽朝開波，重頭戲係喺美國格倫代爾舉行嘅墨西哥硬撼烏拉圭。「烏圭」王牌蘇亞雷斯雖有望神奇復出，但啱啱好番狀態唔慌弗得去邊，墨西哥近8仗保持清白之身，加上有「墨國Sam哥」奧祖拿鎮守大門，預計今仗唔會多波入，一於捧1.52倍嘅2.5球細盤。
（now 650周一早上8時直播）
烏拉圭向來靠晒蘇亞雷斯數胡，隊友卡雲尼都要靠邊站做綠葉，不過「阿蘇」喺上月尾為巴塞於西盃決賽對西維爾之役，喺下半場拉傷肌肉，被換走返到後備席喊晒口，都幾嚴重。初時話「阿蘇」要休息4周，即係3場美洲盃分組賽唔出得，最快要到淘汰賽先可復出，點知呢位巴塞前鋒康復進度比預期理想，前日喺42度高溫下，佢已經跟大軍一齊操練，似乎已經好番可候命搏殺，《馬卡報》更話「阿蘇」可能今仗對墨西哥就可披甲添，快過打針，但斯維覺得「阿蘇」就算今場上陣，仍需要時間操起狀態，況且卡雲尼不嬲都孭唔到飛，烏拉圭鋒力並唔係想像咁勁。
墨西哥近8仗冇失波
另一邊廂，墨西哥近況弗到漏油，連世盃外及熱身賽在內，近8仗贏晒不特止，全部都冇失過波，當中不得不提門神奧祖拿，呢位於2014年世盃堅搶鏡嘅「墨國Sam哥」，過去兩季喺西甲發展唔太如意，必定趁今次大賽再顯身手，佢神起上嚟，等閒前鋒難越雷池半步。墨西哥雖有「小豌豆」射手查維亞靴南迪斯壓陣，但睇番之前8仗贏波，有6場總入球未達3球，睇得出呢班波都係穩陣行先，相信今仗對「烏圭」唔敢輕舉妄動，入球細（2.5球）有1.52倍值得捧場。