另1場法國主場對蘇格蘭，法國身為決賽周主辦國，絕對唔想失禮人前，備戰工作特別認真，近9場熱身賽贏咗8場，當成正式賽事咁踢，總之要贏到盡，保持最佳士氣及狀態迎接揭幕戰。反觀蘇格蘭冇份踢決賽周，戰意差一大截，相信唔會破壞主隊好事，博法國1.65倍讓球主勝。（周日凌晨3時開賽）
由於法國踢歐國盃外圍賽唔計分玩玩吓，因此領隊迪甘斯非常重視熱身賽，要求球員打真軍，希望測驗球隊最佳戰鬥力及保持決心。一眾球星亦交足功課，近9場熱身賽8勝1負，僅輸過畀英格蘭，曾砌低葡萄牙、德國及荷蘭等勁旅，日前就以3比2力挫喀麥隆，中場保羅普巴使出碧咸式「七旋斬」傳中，助攻基奧特入波，皮耶又表演精彩罰球，法國「黃金中場」再現，等閒之輩難以招架。今場係法國出戰揭幕戰對羅馬尼亞前最後1場熱身賽，更加要贏番場漂亮勝仗壯聲勢。
蘇格蘭唔夠班等劏
蘇格蘭大部分球員喺英格蘭搵食，但都只係效力英超弱隊或英冠球隊，實力低法國兩班。同埋球隊冇份踢決賽周，根本唔會搏，上仗熱身賽對意大利全場得1次射門，最後輸埋0比1就係最佳證明，今仗遇上實力同決心更強嘅法國，隨時大敗。