近6次對賽5勝1和
美洲盃聽朝好戲連場，其中B組首輪巴西出戰厄瓜多爾。雖然「森巴兵團」今次冇選隊長尼馬，而卡卡又因傷臨時退隊，但仲有「古仔」菲臘比古天奴孭飛，加上近6次交手贏咗5場，擺明食住厄瓜多爾，相信可旗開得勝，小讓平半值得捧場。
由於嚟緊8月巴西舉行奧運，眾所周知佢哋恨攞從未攞過嘅奧運男足金牌，恨到發燒，而隊長尼馬所屬嘅巴塞唔畀佢踢晒兩項大賽，因此雙方傾掂數，讓「新比利」參加奧運，佢喺美洲盃獲得免役，好衰唔衰，另一球星卡卡日前練波時整傷肌肉，臨時退隊。好彩，巴西仲有菲臘比古天奴撐住，佢上仗熱身賽對巴拿馬開波冇耐即助攻莊拿斯干卡維斯建功，乘住「大佬」尼馬缺陣趁機於國家隊上位。除咗「古仔」之外，32歲嘅莊拿斯干卡維斯難得獲徵召，呢位葡超金靴梗係要踢爭氣波喇，而新星加比爾巴保沙上仗表現亦獲好評，連同韋利安、卡斯米路等壓陣，實力絕對唔曳。
厄瓜多爾近況輸條街
厄瓜多爾續由曼聯中場路爾斯華倫西亞、韋斯咸前鋒安拿華倫西亞等英超兵擔大旗，但同「森巴兵團」相比仍差成條街，佢哋連世盃外已連續3仗未贏過，上仗同美國「拍跳」更輸0比1，狀態明顯唔弗。加上雙方近6次正式交鋒，巴西錄得5勝1和佳績，完全係格食格，厄瓜多爾難逃厄運，巴西上盤有計。