歐洲國家盃將於下周六凌晨開鑼，兩大熱門法國、德國今晚分途出擊踢友賽作「最後閱兵」！先嚟德國主場對匈牙利，德國上仗熱身賽倒輸畀斯洛伐克1比3，領隊勒夫為免軍心崩潰，會要求穩陣至上唔好再犯錯，兩軍今場隨時Hea踢了事，大細中位數為2.5/3球，捧2.1倍入球細。
（無綫翡翠台及TVB 13周日凌晨零時直播）
德國自2014年捧走世盃後，表現愈嚟愈曳，當中攻力衰退得好明顯，好似上屆歐國盃外圍賽攻入34球，上屆世盃外圍賽更有36球進帳，但今屆歐國盃外圍賽只入得24粒，往日強攻霸氣蕩然無存。前面唔掂，最大鑊係後面都慌失失，領隊勒夫上仗熱身賽仲夠膽搵2位後備門將賓特尼奴及達史特根上下半場輪流把關，結果達史特根「屙蛋」出醜，成為球壇笑柄。堂堂世界冠軍搞到如此田地，令人失望。
由於今場係德軍出戰決賽周最後1場拍跳，相信勒夫唔會再玩嘢，會派番紐工把關，依家德軍最緊要「維穩」，唔好有傷兵及避免犯錯打擊士氣。考慮到德國有機會喺決賽周再遇匈牙利，亦未必出真功夫，大家要有悶戰準備。
匈牙利擅玩悶蛋戰術
匈牙利相隔44年再次打入歐國盃決賽周，全靠「悶蛋戰術」，10場外圍賽只入11球及失9球，最後靠贏附加賽出線，既然戰術奏效，自然要沿用。匈牙利實力有限，面對勁旅冇得選擇焗守，近2場熱身賽分別打和克羅地亞1比1及悶和科特迪瓦0比0，今場入波唔慌多，2.1倍入球細好路。