麒麟盃復辦晒冷搶Ｗ
歐國盃及美洲盃如箭在弦，亞洲區亦有「麒麟盃」，東道主日本主場迎戰保加利亞。日本身為主辦國可謂精銳盡出，香川真司、岡崎慎司、長谷部誠等多位歐洲兵皆在陣中。反觀保加利亞青黃不接，仲要遠赴東亞比賽，形勢相當輸蝕，今場讓球盤日本讓一球，上盤可捧。
（有線61、201台周五晚6時40分直播）
「麒麟盃」由91年創立開始，曾經一年一度舉行，但12年停辦後，相隔4年終於復辦，並繼續由日本財團贊助舉行。呢項賽事可以話係日本嘅「私家盃」，近4次都係佢哋捧盃。今屆參賽球隊除咗日本之外，仲有保加利亞，波斯尼亞、丹麥，簡單採取淘汰制。
球星列陣戰意爆燈
賽事難得復辦，日本當然全力以赴踢好波，希望贊助商未來繼續支持；佢哋陣中擁有李斯特城前鋒岡崎慎司、多蒙特中場香川真司、國際米蘭後衞長友佑都，卡士十足，即使AC米蘭中場本田圭佑膝傷多數倦勤，對冠軍依然志在必得，戰意肯定佳。
保加利亞近年戰績持續不振，再出唔到貝碧托夫呢類球星，現時陣中以效力保加利亞及土耳其聯賽嘅球員為主，前鋒線由効力莫斯科斯巴達嘅艾夫連波波夫攻堅，質素確實麻麻，今仗對住球星如雲嘅日本，睇怕冇運行。