第45屆、亦稱為「百年美洲盃」聽朝拉開戰幔，揭幕戰A組由主辦國美國迎戰哥倫比亞。「花旗國」以往於美洲盃戰績一般，不過今次有主場之利，加上主帥「奇哥」奇連士文備受壓力，今次點都唔想失威。哥倫比亞雖然實力勝一籌，但王牌「J神」占士洛迪古斯於皇馬長居後備，影響狀態，況且鋒線進攻點少鋒力弱，對上2屆美洲盃，哥軍於法定時間場均總入球數字全部少過3球，入球細（2.5球）咪錯過。
（now 650及Viu TV 99台周六早上9時30分直播）
奇哥壓力大 美國丹普西孭飛
美國以往曾經3次攞「外卡」出戰美洲國家盃（包括前身南美國家盃），成績最好係1995年奪得殿軍，其餘2次均於分組賽行人止步。雖然上年先至舉辦美洲盃，但為慶祝美洲盃今年創辦一百周年紀念，故特別加開1屆，美國今屆以東道主身份參賽，梗係唔衰得。而且美國自從贏得2013年美洲金盃後，2014世盃、2015美洲金盃分別於16強及4強出局，3月更喺世盃外爆大冷以0比2輸畀危地馬拉，令主帥奇連士文壓力大增，因此今次「大晒冷」，丹普西、米高巴特利等主力悉數列陣，勢必搏甩髀，戰意旺盛。
哥倫比亞占士洛迪古斯未弗
哥倫比亞點秤都贏美國，不過踢波嘅嘢唔可以齋睇牌面，尤其係王牌「J神」占士洛迪古斯，今季喺皇馬長期做後備，你話佢狀態好弗就一定呃人，前線單靠卡路士巴卡容易被嘜死。哥倫比亞近2屆美洲盃於8強出局，特別係前鋒演出差強人意，對上2屆有法卡奧、積臣馬天尼斯等壓陣，但8場比賽僅入4球，好彩防守總算交到貨，8仗法定時間有7仗保持不失。今仗話晒揭幕戰，預計雙方都唔想輸會踢得保守，哥倫比亞領隊比克文亦坦承今屆幾個前鋒狀態麻麻，確認會踢5個中場。兩軍自1961年至今17次交手有11次開細盤，不妨追多鋪。