縮頭龜海地守得穩
聽朝美洲國家盃B組嚟到次輪賽事，早場先由巴西出戰海地。雖然睇落今仗強弱懸殊，但「森巴兵團」今屆冇選隊長尼馬，成條鋒線即刻死晒火，上仗唔輸已執身彩，仲有中場主力韋利安因傷未必出得，衰多兩錢重，面對近6仗全開半場和嘅「縮頭烏龜」海地，初段隨時咬唔入對手，半場和值得追多鋪。
（now 650周四早上7時30分直播）
巴西近年中前場質素參差，2014年世盃連費特都可以擔正打中鋒，搞到成日都要「新比利」尼馬單天保至尊，若果呢位隊長有乜頭暈身熱，巴西進攻就死晒火。今次巴西足總決定讓尼馬參加8月嘅奧運，唔搵佢打美洲盃，呢個問題再度現形。喺首輪對住厄瓜多爾，巴西全場控制大局，但攻勢唔多入肉，仲有自己門將艾利臣比加擺烏龍，若非球證誤判厄瓜多爾入球前嘅傳中波出咗底線在先，賽果就唔係0比0，巴西唔輸都偷笑。
海地近6場全開半和
海地世界排名第74，有幾多斤両心中有數，但佢自己知自己事，無論對邊隊都會做「縮頭烏龜」，死守到底，連熱身賽在內，近6仗全部開半場和，證明初段有氣有力下守得兩嘴。況且巴西中場韋利安上仗傷出，今仗上陣成疑，初段唔易攻破海地嘅鐵桶陣，不妨再捧半場和。
厄瓜多爾食住秘魯
至於同組尾場厄瓜多爾對秘魯，兩軍實力不相伯仲，秘魯隊長荷西古里路首仗贏海地更一錘定音，不過近6次正面交鋒，佢哋錄得1勝1和4負嘅劣績，明顯畀厄瓜多爾食住，斯維寧揀厄軍主勝。