美洲國家盃周六早上上演D組次輪賽事，阿根廷將於美國芝加哥撲擊巴拿馬。阿根廷首場喺缺少美斯下，仍以2比1擊退衞冕嘅智利，盡顯球隊爭標實力。不過，巴拿馬首場亦以2比1擊敗玻利維亞，表現令球迷驚喜，加上今次有半個主場之利，應該有力與阿根廷周旋到底。阿根廷近5仗有4次僅勝對手1球，縱然有美斯傷愈有望復出，但主W賠率實在太熱欠分頭，一於改敲讓球主客和嘅「讓球和」。
（now 650周六早上9時30分直播）
近5戰4次小勝1球
阿根廷喺今屆美洲盃精銳盡出，首場分組賽雖有美斯因傷缺陣，而阿古路亦暫列後備，但仍憑迪馬利亞及班尼加兩人各自交出1個入球同1次助攻，以2比1擊敗上屆冠軍兼同組實力最強嘅智利。論實力阿根廷今仗無疑遠勝對手巴拿馬，但球隊喺主帥馬天奴帶領下踢法相當穩陣，近5仗全勝但有4場都係「煲魚生粥」小勝1球；而且上年喺智利舉行嘅美洲盃決賽周，阿根廷分組賽兩場贏波同樣係以1比0擊敗烏拉圭與牙買加，證明呢班波甚懂留放之道。阿根廷超級巨星美斯雖已復操，今仗大有機會正選上陣，但相信唔會影響球隊嘅穩陣踢法。
巴拿馬有半個主場
巴拿馬首輪分組賽以2比1擊敗玻利維亞，表現大獲好評，老將前鋒巴拉斯佩雷斯更梅開二度，呢位喺美職溫哥華白帽搵食嘅前鋒，今仗有力對阿根廷後防造成威脅。由於今屆賽事喺美國舉行，對嚟自中北美洲嘅巴拿馬恍如有半個主場之利，就算實力唔及阿根廷，但今場戰況相信唔會一面倒，讓球主客和阿根廷讓一球，一於推介「讓球和」畀大家。