美洲國家盃B組最後1輪分組賽，巴西同秘魯進行生死鬥，由於同組嘅厄瓜多爾好大機會喺最後1仗擊敗海地，巴西、秘魯邊隊落敗就可能被淘汰，絕對不容放軟手腳。巴西上仗大炒海地7比1重拾射門鞋，加上近7次對秘魯取得5勝2和，熱捧讓球主勝。
（now 650周一早上8時30分直播）
目前B組形勢，巴西、秘魯同得4分，厄瓜多爾得2分，海地0分已篤定出局。由於厄瓜多爾喺同日較早舉行嘅比賽如無意外可以擊敗海地，巴西、秘魯一旦落敗就出局。雖然巴西得失球差佔優，和波已夠出線，但為免有任何閃失，相信陣容鼎盛嘅巴西唔會刻意求和，必以3分為目標。
秘魯近7次對巴西未贏過
秘魯要贏波才可確保出線席位，不過球隊面對弱旅海地只能小勝1比0，上仗對厄瓜多爾領先2比0下亦被逼和2比2，無論攻守都有不足之處，同巴西相比高下立見，何況秘魯近7次對巴西只得2和5負，包括近3次全敗，今仗熱捧巴西讓球主勝正路。
美斯復出即「戴帽」
另外，美斯傷愈復出即大演帽子戲法，呢位球王喺昨晨美洲盃D組，後備上陣轟入3球，協助阿根廷大勝巴拿馬5比0，提早1輪取得出線8強資格。同組上屆冠軍智利有維達爾梅開二度，包括補時射入12碼，以2比1絕殺玻利維亞，打開勝利之門。