宇佐美興梠慎三鬥射術
今午兩場日職補賽戲碼強勁，尤以大阪飛腳主場迎戰浦和紅鑽更加係全國矚目，兩軍近30次聯賽碰頭只有一次冇波入，當中22仗總入球最少都兩個，今場一於撐1.85倍大盤(2.5球)。
（有線61及201台周三下午6時直播）
自1993年日職創立以來，大阪飛腳同浦和紅鑽呢個對決已經成為最受關注嘅國家打吡，連飛腳老臣子遠藤保仁賽前都話特別緊張，今仗係國家打吡首次喺大阪嘅吹田球場上演，即使唔係假日，預期最少都會有逾3萬球迷入場。
飛腳自長谷川健太領軍後，對紅鑽取得5勝2和佳績佔上風，雖然今仗前線有安達臣柏德列同長澤駿養傷，中場米倉恒貴停賽，但星級小將宇佐美貴史一定會搏盡，皆因佢踢完首階段賽事後好大機會再闖德甲，加盟奧格斯堡，當然要盡踢身價波，球隊目前位處中游，冇搶分壓力可以放開懷抱同紅鑽對攻，相信入球唔會少。
紅鑽目前位列第3，落後榜首川崎前鋒7分但踢少兩場，爭首階段冠軍尚未絕望，當然會以全取3分為目標，今仗佢哋亦有守將森脇良太坐波監，但箭頭興梠慎三有望以超齡球員身份代表日本踢奧運，呢場波亦一定去盡。兩雄相遇好有機會開出入球騷。
東京對三箭首選細盤
同時上演嘅仲有FC東京主場對廣島三箭（有線64台周三下午6時直播），東京上月起改踢433陣式，墮後中場高橋秀人掃蕩力強，等於踢5個後衞，佢哋近4場聯賽零失球，可惜前線僅靠前田遼一搵食，攻力嫌薄弱。
廣島防線保持一貫穩定，鋒將彼得烏達卡腳風奇順，配合淺野拓磨反擊威力大，但吃虧在中場森崎浩司同米傑治傷晒，嚴重影響組織效率，今仗首選入球細（2.5球）。