歐國盃今晚進行第二輪分組賽，A組嘅東道主法國壓軸登場，會喺南部城市馬賽迎戰決賽周新丁阿爾巴尼亞。法國上場對羅馬尼亞雖然贏得驚險，不過經過首場熱身，球員狀態應該漸入佳境，況且阿爾巴尼亞今仗有隊長簡拿停賽，連最有大賽經驗嘅靈魂人物都冇埋，阿爾巴尼亞想爆冷都幾難，讓球主客和法國讓一球，波童捧讓球主勝。
（now 651及樂視體育周四凌晨3時直播）
無可否認，法國揭幕戰對羅馬尼亞表現只係一般，不過好波不如好運，有時踢得唔好仲可以贏波先至最有冠軍相。法國上仗表現唔係一無是處，韋斯咸中場皮耶一入波一助攻，已成球隊進攻核心，「新馬基列尼」尼高路簡迪喺中場築起防線第一道屏障，減輕咗中路防守嘅隱憂，最重要係基沙文、保羅普巴呢班中前場球員仲未上力，俗語講句「大把喺手」，經過上仗寓賽於操，相信法國之後表現會愈嚟愈好。
近5仗入15球火力猛
阿爾巴尼亞以往從未打入任何大賽決賽周，鄉下仔出城未踢先腳軟，首場分組賽以0比1不敵實力一般嘅瑞士，隊長簡拿喺上半場13分鐘之內連攞2面黃牌被逐離場，正係輸經驗嘅好例子，呢名曾經效力馬賽、拉素等大球會嘅隊長，係阿軍陣中最壓得住場嘅靈魂人物，今仗佢要坐波監，對球隊嚟講無疑雪上加霜。況且法國唔只近5場國際賽合共攻入15球，火力強橫，今仗仲有主場之利，球迷數量遠遠壓倒阿爾巴尼亞，即使有一群塞爾維亞球迷拔刀相助，變身「阿國fans」義務打氣，始終聲勢輸蝕，「高盧雞」有力大勝一場，1.6倍讓球主勝捧得過。