同厄瓜多爾爭入4強
美洲國家盃8強聽朝開打，打頭陣由東道主美國迎戰厄瓜多爾，美國近6次對厄瓜多爾有3勝2和1負較佳成績，最近嗰次更加係上個月尾嘅熱身賽，翻查呢6次對賽只得1次勝負差距多於1球，其餘5次總入球都係1球起、2球止，今仗玩中位數2.5球嘅入球細最好路。
（now 650周五早上9時30分直播）
美國今屆揭幕戰雖以0比2不敵哥倫比亞，主帥奇連士文懶理外界嘅批評，沿用固有陣容，之後連戰哥斯達黎加同巴拉圭，結果分別以4比0同1比0贏波，成功搶得首名出線。此舉令「奇哥」攞晒彩之餘，球隊士氣及信心全面回升。
耶迪連停賽 美軍更保守
不過美國後防耶迪連對巴拉圭時領紅，今仗要停賽，預計奇連士文會先填補後防漏洞，事實上美國近2仗都係靠防守致勝，今仗會繼續以穩為先。
厄瓜多爾分組賽頭2仗先打和巴西同秘魯，然後大勝海地4比0，喺B組以次名出線，表現亦算四平八穩。嚟到淘汰賽階段，預計雙方踢法都會較保守，厄瓜多爾分組賽試過悶和巴西0比0，證明防守唔差，既然兩軍之前6次對賽有5次總入球不足3球，捧細盤（2.5球）最穩陣。