C朗有Heart 拿尼夠勇
F組首輪分組賽爆出冷門，被視為小組出線熱門嘅葡萄牙同埋奧地利，分別畀冰島逼和1比1同慘吞匈牙利兩蛋。今輪兩支失意球隊對碰，首戰冇波入嘅C朗鬥心非常之強，相信佢今晚一定會全力爭取入球，以挽回面子，再加埋腳風好鬼順嘅拿尼，要打敗表現回落嘅奧地利，可以話冇乜難度，葡萄牙主勝係信心之選。
（now 651及樂視體育周日凌晨3時直播）
雷聲大雨點小嘅葡萄牙上仗對住歷史性晉級決賽周嘅冰島，喺領先一球下被對方逼和。全場射足10腳嘅首席射手C朗唔單止冇入波，仲要踢空氣添，喺臨完場前有2次罰球機會都把握唔到，認真唔爭氣呀！賽後，C朗仲大發脾氣，唔肯同冰島球員交換波衫同握手，更批評對方全場「泊大巴」，死守踢法絕對唔會喺決賽周拎到任何成績咁話喎！其實，都難怪佢咁嬲嘅，話晒呢位西甲球星一向喺皇馬嘅待遇係「神一般的隊友，豬一般的對手。」
不過，嚟到國家隊，情況就正正相反喇，既無隊友幫拖餵靚波，又被對方守衞貼身嘜實，所以冇波入都係情有可原嘅。不過，C朗都有佢嘅用處，就係可以引晒對手後衞嘅目光，令到拍檔拿尼有更多空位走動，爭取入球機會。呢位費倫巴治射手上仗射入個人歐國盃首個入球，更係歐國盃史上第600個「士哥」，認真威水！相信拿尼開咗齋之後，腳風會更順，今晚由佢帶領葡萄牙出擊，全取3分在望。
奧地利上輪瓣瓣都冇
另邊廂，奧地利今屆歐國盃外圍賽一鳴驚人，10戰取得9勝1和不敗佳績，力壓同組嘅俄羅斯同瑞典，以小組首名進身決賽周。但原來係假象嚟，佢哋上仗以大熱姿態對住匈牙利時，攻守瓣瓣冇，後衞德高域下半場更領紅被逐離場，10人應戰嘅奧地利最後以0比2慘敗。喺歐國盃外圍賽獨取7球嘅巴素利前鋒真高同埋今季喺史篤城貢獻11球嘅阿拿奧杜域，全場都死晒火！今晚對住技高一籌嘅葡萄牙都幾難搶分，一於撐葡軍主勝。