今晚歐國盃A組尾輪矚目之戰，由東道主法國迎戰「十字兵」瑞士。法國頭兩仗贏晒篤定出線，今仗只要打和便可取得首名資格，而瑞士攞多1分亦肯定次名出線。法國今屆幾番變陣，但進攻都未有改善，預計今仗會收起部分主力繼續試陣，瑞士亦火力欠佳會穩陣行先，近6次交手，有4次總入球少於3球，捧細盤（2.5球）最划算。
（now 651及樂視體育周一凌晨3時直播）
法國頭2仗雖然贏晒全取6分，但2仗都係老鼠拉龜冇碇埋手，要去到比賽尾段先至攻入奠勝球絕殺對手，毫無霸氣可言，尤其係進攻方面，無論首仗對羅馬尼亞用保羅普巴、基沙文打正選，又抑或次仗對阿爾巴尼亞改用安東尼馬迪爾、京士利高文，結果都要下半場變陣才取得優勢，你可以話領隊迪甘斯應變力強，但佢仲未搵到「高盧雞」最佳進攻方程式係事實；由於已篤定出線，預計法國今仗會收起部分主力，如兩閘老將艾拉及沙格拿，繼續試陣，但話分兩頭，若果法國今仗輸波，就會畀瑞士搶走首名資格，所以佢哋亦唔會亂嚟，睇準機會先插你一刀。
瑞士鋒力弱唔敢壓上
另一邊廂，次席瑞士領先第3位嘅羅馬尼亞3分，今仗只要唔輸就肯定可以次名出線，「十字兵」一向守強攻弱，近兩仗分組賽總入球都係1球起、2球止，首仗對阿爾巴尼亞大部分時間打多1個，佢哋都唔敢壓得太上，球隊無論起用施費洛域定比列安保路打箭頭，效果都唔理想，預料今仗會先做好防守，何況瑞士中場格列沙加勇悍之餘，佢今屆成功傳球唔少於218次，仲勁過德國中場核心卻奧斯，暫時冠絕今屆眾將，有沙加壓陣能穩住「十字兵」中場線，法國想攻入去都唔係咁易。況且兩軍近6次碰頭，有4次場均總入球少過3球，今仗大家各有踢得保守嘅理由，不妨捧入球細（2.5球）。