英倫打吡 巴利仔做急先鋒
歐國盃16強上演「英倫打吡」，威爾斯硬撼「兄弟兵」北愛爾蘭話題十足。兩隊波首度參賽即殺入16強，表現令人刮目相看，不過貨比貨之下，有加里夫巴利同艾朗藍斯壓陣嘅威爾斯無疑高一線，而且「紅龍」係正宗急先鋒，分組賽3仗都喺上半場領先，北愛未必頂得住威爾斯急攻，不妨捧「紅龍」半場勝。
（樂視體育周日凌晨零時直播）
進步神速嘅威爾斯自58年世盃後再參加大賽，眾將渴望證明自己嘅實力，結果喺分組賽全面爆發，尤其喺王牌加里夫巴利帶領下，球隊踢出凌厲反擊，經常趁對方初段陣腳未穩搶得先機。翻睇威爾斯3場分組賽，唔單止全部喺上半場先開紀錄，而且全部開出半場勝，面對「英倫大哥」英格蘭亦係先勝後敗，今仗好大機會照計劃搶「甜頭」。
北愛入16強有晒交代
同樣係首度參加歐國盃決賽周嘅北愛爾蘭，喺C組錄得1勝2負成績，僅僅成為4支最佳第3名之一晉級，呢個成績已經有晒交代，不過佢哋踢法獨沽一味，相信好難抵擋威爾斯嘅急攻，加上兩隊近4次碰頭，「紅龍」有2次開出半場勝，值得追多鋪。