搶灘16強 鐵三角狙擊C朗
話咁快歐國盃分組賽已經踢完，36場波夾埋只有69個入球，成為自1992年歐國盃決賽周之後嘅最低紀錄，對於要捱夜睇波嘅香港球迷嚟講，真係睇到又悶又辛苦呀！不過嚟到16強階段，比賽應該會刺激好多，當中有一路奇兵相當特出，就係於D組取得2勝1和，以首名資格出線嘅「格仔兵團」克羅地亞。球隊今晚會同唯一一隊喺分組賽未贏過嘅葡萄牙合演16強賽事，兩隊分組賽表現差天共地，相信克羅地亞可以輕易擊敗葡軍晉級，主勝絕對係信心之選。
（now 651及樂視體育周六凌晨3時直播）
文迪蘇傑莫迪歷復出
歐國盃16強上下線兩個戰區實力懸殊，下線齊集英格蘭、西班牙、德國、意大利同法國5大傳統勁旅，堪稱歐國盃史上最地獄嘅死亡下線。至於上線就有克羅地亞呢支火力唔錯嘅奇兵，「格仔兵團」分組賽表現令人眼前一亮，尤其係最後一輪分組賽，就算主將莫迪歷因傷缺陣，射手文迪蘇傑亦被收起，但結果都以2比1擊退衞冕嘅「狂牛兵團」，實力絕對不容輕視，計我話克羅地亞甚至有潛力奪得今屆歐國盃冠軍添！睇吓李斯特城喺啱啱完結嘅英超球季，可以擊敗曼城、阿仙奴同曼聯等傳統勁旅，奪得球會史上首個英超冠軍，就知道異軍隨時會跑出啦！
王牌前鋒文迪蘇傑對捷克一役被對手撞傷，上輪最後1場分組賽已同莫迪歷齊齊缺陣，佢哋今仗據講可以趕及復出，加埋巴塞中場球星拿傑迪錫合力策動進攻，呢個進攻鐵三角相信可以撕破任何一隊嘅防線。
C朗失機多過入波
另邊廂，連和3場分組賽嘅葡萄牙幸運地以小組第3名出線；王牌球星C朗一向喺國家隊表現麻麻，呢位世界級射手喺頭兩輪分組賽，射門超過20次，但腳風唔順搞到一球都入唔到，尤其喺對奧地利一仗，C朗唔單止射失12碼，仲有多次射門機會都全部錯失，一係中柱一係高出，把握力差都暈。雖然最後1輪分組賽對匈牙利，C朗梅開二度兼且交出靚助攻，並當選全場最佳球員，但佢嘅表現始終不穩，今仗對住氣勢如虹、信心十足嘅克羅地亞，相信葡萄牙難逃輸波厄運，主勝絕對係明智之選。