歐國盃16強淘汰賽，世盃冠軍德國於里爾迎戰斯洛伐克，德國無疑仍然係今屆大賽奪冠熱門，不過佢哋喺贏得世界盃後，近兩年表現嚴重走樣，計戰績竟然比斯洛伐克更差！如果計算埋讓球盤，德國兩年來22場國際賽竟然有16場輸盤，輸盤率高達72%，長捧上盤真係輸死人。黑柴仍然相信德國可以闖過斯洛伐克一關殺入8強，但過程絕對唔會輕鬆，今場德國讓球1球、球半，寧捧斯洛伐克下盤。
（now 651及樂視體育周一凌晨零時直播）
德國兩年前擊敗阿根廷捧走世界盃，繼後演出明顯下滑，領隊勒夫戰術愈嚟愈傾向西班牙化，更着重控球同短傳，缺少側擊同直接埋門，踢法迂迴，絕少大勝。睇番德國呢兩年來共踢咗22場國際賽，成績只係12勝3和7負，如果計算讓球盤，盤路更加係5贏1走16輸！
勒夫首重安全第一
德國今屆決賽周分組賽雖然以零失球同C組首名姿態出線，不過近兩場對波蘭同北愛爾蘭都係輸盤，而且3戰加埋只入3球，一眾攻擊主力包括湯馬士梅拿、奧斯爾、馬里奧葛斯都未進入狀態，高大中鋒馬里奧高美斯把握力亦未能予人信心。德國傳媒賽前重點提出，勒夫今屆戰術主導目標係：安全第一！相信嚟到淘汰賽會更加保守，何況若然德國闖過斯洛伐克一關，8強對手將會係勁敵西班牙或宿敵意大利，相信即使今晚取得領先優勢，亦會志在控球在腳，唔會去得太盡。
斯洛伐克賽績更佳
斯洛伐克以B組第3名身份進身16強，分組賽表現唔算搶眼，不過勝在防線組織嚴密之餘，亦擅長快速反擊。事實上，斯洛伐克過去兩年21場國際賽，共取得13勝5和僅3負成績，比起德國更勝一籌，歐國盃外圍賽緊隨西班牙之後以次名出線，而且兩戰西班牙大家各勝一仗，成績絕對見得人。斯洛伐克上月熱身賽作客奧格斯堡爆冷贏過德國3比1，今屆決賽周最後一戰亦頂住英格蘭狂攻，絕對唔容易大敗，今晚喺無壓力下面對德國，輸盤可能性唔高。