冤家對壘步步為營
今晚歐國盃16強上演上屆決賽翻版，意大利對西班牙，呢兩支「冤家」已連續3屆歐國盃交鋒，每次戰情都係大同小異，屬於攻防戰格局，往往緊張而不精彩，入球數字偏低。尤其是今仗係淘汰賽，一戰定生死，預料雙方會比較謹慎，首選半場和。
（now 651及樂視體育周二凌晨零時直播）
意大利今屆演出令人喜出望外，首兩戰贏晒，提早取得出線權，但要留意兩場勝仗，僅贏比利時2比0，險勝瑞典1比0，最後1場分組賽0比1不敵愛爾蘭。連帶包括之前兩場熱身賽，分別贏蘇格蘭1比0，以2比0擊敗芬蘭，可見藍衫軍已重拾昔日意式保守風格。
簡達華缺陣焗穩守
事實上，意大利近年缺乏出色進攻球員，領隊干地只能採取穩陣戰術，加上進攻中場簡達華受傷，今仗缺陣，干地更加冇主攻本錢，惟有焗用穩守突擊，只要上半場唔輸，換邊後就有生機。
另一邊廂，西班牙雖然以攻力強見稱，但以往遇上意大利，經常老鼠拉龜，近6次交手有5次上半場和波。值得一提，2008年歐國盃8強對壘，意軍處於弱勢，仍守和120分鐘不失。上屆分組賽打成1比1，開出半和全和，至於決賽西班牙可以炒意大利4球，好大程度因為意軍中場莫達傷出，球隊又用盡換人名額，等於讓半臂，令西班牙佔壓倒性優勢。
近3次交鋒「半場和」
雙方之後喺2013年洲際國家盃碰面，激戰120分鐘打和0比0，西班牙僅憑互射12碼勝出，兩隊今年3月熱身賽打和1比1，近3次交鋒都開出半場和，睇嚟今仗情況都係差唔多，值得再追。