鶴臣唔敢再玩「神調動」
歐國盃今晚上演最後2場16強賽事，壓軸尾場由英格蘭出戰冰島。英格蘭主帥鶴臣上仗大輪換換出禍，搞到次名出線畀人鬧爆，好彩只係撞正新丁冰島，佢今仗唔敢再玩嘢，會用番朗尼、丹尼路斯、迪利阿里等打番正選，況且冰島能殺入淘汰賽已算超額完成，冇晒心理壓力大有機會同「三獅兵團」對攻，捧中位數2.5球嘅入球大更划算。
（now 651及樂視體育周二凌晨3時直播）
英格蘭喺B組最後一場大輪換，結果同斯洛伐克互交白卷，搞到畀威爾斯搶咗榜首，僅以次名晉級。主帥鶴臣嘅「神級調動」備受抨擊，但佢咁做，令朗尼、丹尼路斯、基爾獲加等主力獲得休息機會，養精蓄銳迎接淘汰賽。再講，「三獅兵團」堅有運，因為F組嘅冰島喺分組賽尾場絕殺奧地利，取代葡萄牙次名出線，你問「學神」想對冰島定「剋星」葡萄牙多啲？梗係冰島喇，今次算係錯有錯着。
冰島超額完成放手對攻
不過，上仗大輪換被鬧爆後，鶴臣都唔敢再亂嚟，英國傳媒大爆佢今仗會用番大部分主力，包括朗尼、基爾獲加、丹尼路斯、迪利阿里、哈利卡尼打正選。好多人都覺得今屆未開齋嘅「哈利仔」表現麻麻，但查實上仗代替佢嘅占美華迪演出亦一般，「華Dee」暫時較適合做後備殺手，加上拉爾拉拿傷勢冇大礙，預計佢會同「哈利仔」、史杜列治合組三叉戟，仲有朗尼同迪利阿里後上支援，火力一樣咁猛。
冰島睇落好似幾守得，但佢哋喺分組賽面對奧地利、匈牙利等攻擊力一般嘅球隊，亦百密一疏保唔住清白之身，防線唔算太穩健。翻查紀錄，連同之前熱身賽在內，冰島近8仗入16球失13球，當中有6場總入球達3球或以上，證明佢哋入得又失得。對於呢個小國嚟講，今屆能進身淘汰賽已屬超額完成，對英格蘭未必再打守勢波，隨時對攻都似，咁樣反而益咗對面嘅「哈利仔」同史杜列治，畀佢哋更多反擊機會。斯維冇懷疑英格蘭會贏唔到，但主W得1.42倍太奀，讓球主勝又唔多夠信心，既然兩隊都咁進取，不如捧有2.4倍分頭嘅大盤（2.5球）好過。