攻力疲弱齊放悶蛋
今晚冇歐國盃睇，可轉移視線睇吓聽朝舉行嘅美聯盃16強賽事，頭場由芝加哥火燄主場對哥倫布機員，雙方排喺美職東岸最低兩位，可以話係難兄難弟。其中火燄上圈主場對低1個聯賽級別球隊印第安納十一，法定時間90分鐘僅打和0比0，攻力非常疲弱。機員今季7場作客未贏過，今仗名副其實水鬥水，大細中位數2.5球，最好揀入球細。
（周三早上8時30分開賽）
火燄上圈同印第安納十一喺法定時間互交白卷，加時打和1比1，最終憑互射12碼擊敗對手晉級，今仗對同屬美職嘅機員，相信火燄即使有地利亦難佔優勢。事實上，火燄近5次主場僅1勝，其中4次總入球都係2球或以下，踢法悶蛋，唔好期望今仗會有大改革。
機員今季7場作客只有3和4負，其中近4次作客有3仗冇波入，恐怕今場好難對火燄防線構成太大壓力。況且雙方今季聯賽首循環交手亦打成0比0，大細中位數2.5球，細盤值得再追。
鹽湖城主場打殘海灣者
同日另一場美聯盃16強，皇家鹽湖城主場對西雅圖海灣者，兩隊近9次對賽都由主場一方勝出，可見地利因素主宰勝負，加上西雅圖海灣者近5仗作客4敗，主力丹普西剛踢完美洲盃都未抖過，今仗披甲機會唔大，想破宿命難上加難，皇家鹽湖城主勝值博。