嚴密防線明恰一人球隊
今晚上演歐國盃首場8強戰波蘭對葡萄牙。葡萄牙晉級過程荊棘滿途，係8強中唯一90分鐘未贏過波球隊，今仗未必可攻破防守堅固嘅波蘭，由於兩隊和波比率高，建議保守啲捨下盤捧讓球主勝。
（now 651及樂視體育周五凌晨3時直播）
葡萄牙近年國際賽表現平平，能夠長期成為熱門，全因一個C朗，當然佢嘅能力不容置疑，例如分組賽對匈牙利就曾經一個救全家，逼和對手3比3出線，但整體而言，葡萄牙畀人感覺係欠缺系統，經常靠單打獨鬥突破，除C朗外，拿尼同哥利斯馬都太鍾意「上腳」，令對手易於防範。
葡萄牙遇防守踢法例冇計
事實上，葡軍過往面對刻意防守球隊，都顯得一籌莫展，如首兩場分組賽即使形勢一面倒，射門合共多達50次，卻僅貢獻1個入球，16強對克羅地亞更「經典」，兩隊合演悶戰，共同締造咗歐國盃決賽周史上，首次90分鐘0射中目標賽事，效率之低嚇親人。
波蘭其實都唔算咩上乘球隊，但勝在穩打穩紮，領隊拿華卡崇尚防守，踏入16年波蘭僅失過3球，分組賽更以0失球出線，如果波蘭今場效法對德國場波咁穩守突擊，葡萄牙要撕破波蘭防線真係唔易，畢竟波蘭防線壓迫力強，而且補位快速，甚少犯低級錯誤。
羅拔仔棄入波製造空位
相比起葡萄牙隊長C朗，波蘭隊長羅拔利雲度夫斯基表現更加踏實，佢明知自己成眾矢之的，經常喺前線製造空位畀隊友，令後上嘅米利克及巴拉斯塞高斯基受惠，無私表現絕對值得一讚，簡單啲講，今場可以話係團體合作與個人主義之戰，樂比相信波蘭可以好似對上兩次交手咁，守得住葡萄牙！