8次大賽交手從未贏過
歐國盃今晚迎來8強最強戲碼，由兩支傳統勁旅德國同意大利交鋒，今場焦點係宿命之爭，因為德國有「恐意症」，8次大賽（歐國盃及世盃）交手從未贏過，面對士氣爆燈嘅意大利，真係冇乜甜頭，意大利受讓平半捧下盤。
（now 651及樂視體育周日凌晨3時直播）
兩雄相遇從來唔係博彩好時機，因為乜戰果都會發生，但淘汰賽兩隊輸唔起，踢得比較謹慎，加上歷年來對賽意大利都食住德國（33戰僅負8次），大有格食格味道，所以下盤始終略為秤先。事實上，今屆歐國盃除咗入球少（每場平均僅得2球），下盤比例都係偏高，所以今場隨時鬥到加時互射12碼都唔奇。
德國挾世界盃冠軍之名出戰，論人腳質素肯定秤先啲，而且日耳曼兵團出名專業，樂比唔會懷疑佢哋嘅爭勝心同飢渴感，但相比起德國，意大利球員嘅精神面貌似乎更勝一籌，喺領隊干地嘅激勵下，球員踢出超出自己嘅水平，早前面對被睇高一線嘅比利時及西班牙，意大利都能夠技術性擊倒對手，足見球隊狀態甚佳。
意大利「ＢＢＣ」+保方穩陣
意大利最厲害之處係防守堅固，「BBC」三後衞巴沙利、邦路斯同基亞連尼加上門將保方都係來自祖雲達斯，4人與領隊干地合作無間，而且意大利絕對唔係齋守唔攻，其壓迫防反戰術對住比利時及西班牙等主攻球隊，合共取得4個入球，可見效率甚高，正如德國領隊勒夫所講，今屆意大利絕對比4年前淘汰佢哋嗰支意大利更強。
干地針對德軍3弱點進攻
意大利今屆踢得咁好，領隊干地功勞至大，佢於2014年帶領祖雲達斯取得意甲3連冠後接手國家隊，深得球員愛戴，擅長激勵球員，所以即使欠缺大牌球星壓陣，但球員紀律甚佳，戰術執行力甚強，係一支好可怕嘅球隊。干地今仗表明會針對德國3個弱點去進攻，就係封殺卻奧斯傳送、限制基迪拉活動範圍，然後再重點攻擊經驗最淺嘅右閘甘美治，且看干地戰術能否湊效。