弗爆射手搶住破冰
法國今晚會喺歐國盃8強對冰島，雖然兩隊同樣由分組賽至今未嘗一敗，但法國除咗有主場之利外，整體人腳實力遠超對手，睇佢哋絕殺羅馬尼亞同阿爾巴尼亞呢2場波就知有幾猛，射手基沙文近期弗爆，斷估冰島半場已經捱唔住，法國半場主勝絕對係信心推介。
（now 651及樂視體育周一凌晨3時直播）
東道主法國喺16強以2比1反勝愛爾蘭，主力射手基沙文喺4分鐘內連入兩粒，成為贏波晉級英雄，保住法國喺自己地頭主辦大賽未輸過嘅金漆招牌。呢位救世主暫時喺歐國盃決賽周攻入3球，另一主力皮耶亦有2球進帳，佢哋為爭神射手獎肯定會搏命搶胡，法國攻擊力絕對有保證。
冰島往績輸幾條街
中場方面，尼高路簡迪停賽，不過對法國嚟講未必係壞事，因為保羅普巴、卡比耶同馬度迪本身就係法國兩年前參加世界盃時嘅中場組合，默契十足。再睇埋往績，兩隊近6次交手，法國取得5勝1和不敗成績，無論人腳實力、經驗同往績都佔盡優勢，相信今晚半場就有力領先對手。
另邊廂，首次參加歐國盃嘅冰島愈戰愈勇，佢哋喺16強以2比1反勝英格蘭，歷史性殺入8強。球隊嘅密集防守戰術非常有效，就算係射手如雲嘅英格蘭都冇辦法撕破佢哋嘅防線。而且，冰島係一支非常團結嘅球隊，成班球員完咗場波興奮到衝去球迷面前，齊齊以充滿「維京風」嘅叫喊同擊掌慶祝贏波，場面非常壯觀，足證全國上下一條心。
雖然冰島擊敗英格蘭後士氣高昂，但咪忘記英格蘭今屆分組賽至16強嘅表現都係唔合格，呢支小國球隊面對法國要再創奇迹絕對唔易，法國半場主勝係穩陣之選。