除咗歐國盃之外，南美自由盃亦嚟到4強，聽朝早上演首回合，由巴西勁旅聖保羅主場對哥倫比亞球隊國民體育會。聖保羅踢自由盃非常醒神，近4次主場出擊全勝，反觀國民體育會近2場自由盃作客連波都入唔到，形勢高下立見，捧聖保羅1.88倍主勝先拔頭籌。（周四早上8時45分開賽，馬會網上文字直播）
聖保羅今季巴甲表現一般，但轉戰自由盃又係另一回事，特別係近4次喺自己地頭踢自由盃全勝，共轟入13球，走勢非常凌厲。事實上，聖保羅係奪得自由盃冠軍次數最多嘅巴西球隊之一，深明來到淘汰賽階段，必須把握首回合主場之利搶先機，佢哋今屆4場淘汰賽取得2勝2負，無獨有偶都係靠首回合主場贏波，為出線打下基礎，今仗必趁地利搏盡搶W。
國體會作客腳仔軟
哥倫比亞代表國民體育會自踏入淘汰賽後，2場作客只獲1和1負，兼夾冇波入，同踢分組賽期間客場3仗全勝判若兩隊，今仗去到巴西，面對「主場王」聖保羅，實在凶多吉少。