踏入7月之後，歐洲球會陸續開操備戰新球季，德甲史浩克04選擇飛到中國集訓，今晚喺佛山世紀蓮花體育中心，同中超豪門FC廣州（廣州恒大淘寶）踢熱身賽。史浩克04雖然上仗大炒廣州RF，但今勻遇上級數更勁嘅FC廣州，相信惡唔出樣。FC廣州採取「銀彈政策」無非要攞威，唔會放過擊敗歐洲球隊嘅「宣傳機會」，戰意可靠主W值博。
（有線61及201台周四晚7時30分直播）
中超剛踢完一半賽程，FC廣州高踞榜首，皆因球隊由巴西名帥史高拉利執教，以及擁有列卡度高拉特、荷西保連奴等高質素外援，實力可媲美歐洲二線球隊。事實上，FC廣州喺中超難逢敵手，更加希望透過同著名外國球隊交鋒，爭取勝利贏取聲譽，對於球隊發展，以至提升中國足球地位都有幫助，有「重要任務」在身，踢呢種熱身賽都會全力以赴。
史浩克人腳唔齊
史浩克04剛周二同廣州RF（廣州富力）踢完熱身賽，睇戰果贏6個1皮好似好輕鬆，但球員始終開操冇耐，狀態未夠，踢得咁密恐怕吃不消。雖然史浩克04有荷蘭射手亨特拉爾隨隊，但翼鋒利萊辛尼、中堅賀維迪斯仲為德國踢緊歐國盃，奧地利中場舒賀夫及新加盟嘅瑞士鋒將比列安保路亦未歸隊報到，人腳唔齊遇上卡士更勁嘅FC廣州，更加信唔過。