法國主場唔衰德
歐國盃嚟到倒數第二場，東道主法國同世界盃冠軍德國合演「歐洲打吡」，亦係冠軍前哨戰，無論邊隊入決賽都注定成為擂台躉。法國近兩仗前線撻着晒，成為大賽入波最多球隊，今晚夫添出擊，當然要恃主場之利搶攻，有利德國一眾星級攻擊手打反擊。加上兩軍防線各有隱憂，預期今仗入波唔會少，黑柴推介2.13倍嘅大盤（2/2.5球）。
（now 651、Viu TV及樂視體育周五凌晨3時直播）
法國今屆5戰共入11球，攻擊手皮耶、基沙文同基奧特輪流爆發，仲有個全國寄望甚殷嘅保羅普巴愈踢愈好，前線多點開花。門將洛里斯賽前講明唔想同德國互射12碼，今晚目標係喺90分鐘內贏波，喺主場球迷助威下，相信領隊迪甘斯想勒都勒唔住，必然採取主動強攻。
法國防線老 德國唔齊腳
防線不穩係法國最大隱憂，4個正選後衞全部年過三十，33歲嘅沙格拿同35歲嘅艾拉呢對二閘不但高齡，仲鍾意助攻，邊路預期會暴露更多空位。事實上法國過去5場波加埋只係畀對手射中過10次目標，但已經失咗4球，唔好忘記佢哋所遇對手只係二三流，世界排名最高嘅只係攻擊力甚弱嘅瑞士，根本未受考驗。
德國今屆畀人嘅印象同法國相反，後防相對穩陣，前線狀態就唔夠弗，上場火併意大利踢到互射12碼險勝，令今仗出現幾嚴重嘅傷停問題，缺少咗中堅曉姆斯、防中基迪拉同箭頭馬里奧高美斯，隊長舒韋恩史迪加上陣機會亦唔樂觀，今仗要起用梅斯達菲同首度披甲嘅小將祖利安韋高，防線實力肯定有所削弱。
不過，德國係大賽球隊，記得兩年前世界盃佢哋踢到16強表現都甩漏甚多，但去到最後3場就全面上力，陣中幾位高速攻擊手奧斯爾、湯馬士梅拿同達斯拿，較早前遇上密集防守嘅弱旅發揮唔理想，但呢班球員全部都係世界級，只要法國防線畀到空位佢哋，唔排除今晚會齊齊復甦。綜合雙方實力、狀態同陣容完整性，呢場勢均力敵嘅冠軍前哨戰，都係捧大盤划算。