歐國盃結束之後，球迷難免會覺得失落、空虛、寂寞，甚至有啲凍，但其實世界各地仲有勁多賽事等緊大家。今晚瑞典超上演前列大戰，榜首馬模主場對奧雷布洛。馬模係傳統班霸，奧雷布洛屬於新興勢力，勢必有激鬥。今場大細中位數提升至2.5/3球，反映莊家預計多波入，一於捧入球大。（周二凌晨1時開賽，馬會網上文字直播）
馬模曾經21次奪得瑞典頂級聯賽冠軍，屬於瑞典球壇一哥，雖然呢支老牌班霸上季成績欠佳，僅排第5位，但今季捲土重來，即顯威勢，12場聯賽贏咗9場，其中近9場聯賽更取得8勝，包括上輪以4比1大炒奧斯達辛斯，近4仗聯賽全勝，共攻入12球。換言之，平均每場入3球，單靠自己都夠開大。
奧雷布洛2014年升上瑞典超後，成績穩步上揚，現時只落後馬模4分。不過，奧雷布洛作客有前冇後，今季6場聯賽作客，有5場總入球達4球或以上，最好捧入球大。
中央陸軍夠料炒烏法
巴甲方面，高士路亦係一支攻強守弱球隊，近5仗總入球都達3球或以上，主場對帕拉尼恩斯，相信都會主攻，捧入球大。另外，俄超將於月尾開鑼，莫斯科中央陸軍同烏法率先於今日踢熱身賽，中央陸軍身為上季聯賽冠軍，實力遠勝烏法，雙方近5次對賽，中央陸軍有4次淨贏兩球或以上，直取讓球主勝。