除咗三箭對鹿角呢場重量級大戰外，較早時間開波嘅有名古屋鯨魚主場對川崎前鋒嘅賽事。鯨魚近期狀態認真麻麻，只計聯賽已經連續9場未贏過，今仗雖有主場之利，但對手前鋒已經保持多場不敗，加上作客表現亦唔錯，今仗有力再贏一仗，阿謙推介前鋒客W畀大家。（有線64及203台周六下午5時直播）
鯨魚近9戰不勝
老牌球會名古屋鯨魚喺在首階段聯賽只能位列第14表現令人失望，當次階段聯賽展開後依然未見起色，上仗作客就以0比1不敵大宮松鼠。事實上，連埋首階段嘅成績，鯨魚喺聯賽已經係連續9場未嘗勝利滋味，球員狀態同士氣都陷於低谷，今仗就算喺主場出擊亦難以睇好。
反觀前鋒次階段首輪作客就以3比0大破仙台維加泰，球隊近6仗贏咗5場狀態一流，就算單計作客賽事，連埋首階段近9場客戰，竟然取得7勝2和嘅佳績，真係唔講得笑。前鋒首席射手大久保嘉人今季上陣18場入咗11球腳風甚順，過去面對鯨魚甚至試過連中三元，簡直係鯨魚剋星，前鋒一定會積極爭取入球，要開出客W應該唔係難事。