歐國盃已到尾聲，但亞洲波就進行得如火如荼，今日除咗日職之外，仲有韓職玩，重頭戲必定係第2位FC首爾主場對第3位蔚山現代。兩隊目前同分，但講到狀態，蔚山現代佔優，近5仗4勝，而且過去5次作客FC首爾，都不敗而回，今仗受讓必取讓球客勝。
FC首爾曾5次捧韓職冠軍，僅次於FC城南，並且係2013年亞冠盃亞軍。陣中最有名氣球員肯定係曾效力摩納哥、阿仙奴等歐洲球會嘅前鋒朴主永。不過呢位30歲南韓國腳高峰期已過，今季18場聯賽僅有5球進帳，似乎名大於實。最大問題係FC首爾近期陷入低潮，尋日新簽嘅國腳守衞郭泰輝亦未知出唔出得，搞到近4仗未贏過，其中近3仗更輸晒，冇本錢讓波。
至於蔚山現代雖然星味唔夠FC首爾，但勝在實而不華，包括盃賽在內，近9仗贏7仗，而且季初曾打和榜首勁旅全北汽車，表現非常硬淨。加上蔚山現代近5次作客FC首爾，取得2勝3和，受讓抵玩。
同日另外兩場韓職，FC光州近4場聯賽主場都贏唔到，讓唔起兩連勝嘅仁川聯，要讓球客勝。至於全南天龍主場對「蠱惑隊」濟州聯，雙方過去碰面慣演入球騷，近5次交鋒，有4次總入球達3球或以上，中位數2.5球，捧入球大。