主力未歸隊旨在鬆筋骨
講履歷安察洛堤唔差得過莫連奴，佢執教AC米蘭、車路士、巴黎聖日耳門及皇馬期間，都有重要錦標落袋，今次加盟德甲一哥拜仁慕尼黑，捧德甲已喺「基本要求」，更大目標自然係擸埋歐聯。不過今晚佢就「巧婦難為無米炊」，11位參加歐國盃嘅球員，以及為智利捧走美洲盃嘅維達爾仍然未歸隊，加上巴西翼鋒杜格拉斯哥斯達養傷，拜仁今仗作客德國第5級別聯賽球隊利普斯達特，靠晒兩位老將列貝利同洛賓孭飛，話唔定老貓燒鬚喎。
（周六晚11時開賽）
鬥第5級別球隊靠兩老孭飛
拜仁慕尼黑剛於周一開操，但羅拔利雲度夫斯基、湯馬士梅拿、阿拉巴、維達爾、紐亞等12位國腳踢完國際賽，仲放緊假未歸隊，後衞貝拿迪亞將轉投祖雲達斯，「肥安」手上兵源唔多夠，未能摸清球隊真正情況，尤其係今場對利普斯達特，旨意晒列貝利同洛賓，帶住一班後備同小將比賽。
可惜呢兩位「老翼」近年飽受傷患困擾，上季抖多過踢，唔好對佢哋抱有太大期望。會方亦明白現時處境，只係搵嚟利普斯達特作為首仗熱身賽對手，擺明志在鬆下筋骨，難怪足智彩都冇開盤，最快都要等到月尾去美國參加國冠盃，先至會見真章。