賄賂球證面臨扣10分
今日下晝除咗多場日乙之外，仲有三場韓職玩，球迷又點可以錯過。先講重頭戲全北汽車作客濟州聯，排榜首嘅全北汽車係韓職唯一嘅不敗之師，但目前正面臨被扣分嘅危機，如果想實現聯賽三連冠，呢排一定要搶分，呢個客勝當然睇高一線。
(周六晚6時開賽)
由於被揭發曾經賄賂球證，韓國足總計劃喺8月17日開庭判罰全北，一般相信除咗罰錢，全北可能至少被扣10分，甚至有另一種講法係罰12至20分之多，依家全北只係Lead住次席首爾8分，假如再唔搶多啲分打底，就算只扣10分都可能冇咗個冠軍，所以唔到佢哋唔搏。
其實全北近況唔錯，除咗喺足總盃Hea踢輸畀富川，根本就無人能敵咁滯，巴西外援李安納度洛迪古斯近期弗到爆，最近三仗都有士哥，難怪連艾阿里呢類中東豪門都向佢招手，相反排第6嘅濟州聯近況非常不濟，球隊已經4場不勝，其實濟州聯最大問題係防守唔集中，經常完場前失波，最近兩場均是先開紀錄，然後被全南天龍及仁川聯以2比1「絕殺」。以全北汽車強橫實力，相信今仗濟州聯難以扭轉頹勢，捧客勝。
蔚山現代FC光州吼無入球
同日另一場水原城對全南天龍，排榜尾嘅升班球隊水原城實力不足以在韓職立足，踢波好講氣勢，排尾二嘅全南天龍近兩仗不敗，讓球客勝唔好錯過。至於蔚山現代對FC光州，主場出擊嘅蔚山現代今季攻力麻麻，僅入19球，攻力排聯賽尾三，今仗面對防守穩健嘅FC光州，0比0機會頗高，7.75倍「無入球」可一試。