奧城缺卡卡 防線又穿窿
美職聽朝好戲連場，阿King就睇中咗溫哥華白帽主場對奧蘭多城嘅賽事，白帽近期表現雖然反覆，但仍然維持高入球率。相反對手奧蘭多城近4仗未贏過狀態低沉，而且作客陷入球荒之餘防線更「穿窿」，加上星級戰將卡卡續抖，今仗都係凶多吉少，一於捧1.51倍嘅白帽主勝。
（TVB 301周日早上10時直播）
白帽近期雖然有點反覆，但攻擊表現其實唔錯，近5仗攻入9球發揮理想。白帽早前即使放走烏拉圭前鋒奧達維奧利華路，但球隊表現似乎未有影響，另一位烏拉圭前鋒德查拉連續兩場都有波入狀態甚弗，配合同胞美斯基達同日本前鋒工藤壯人，球隊攻力能夠維持高水平。
「奧城」近4仗兩和兩負表現一般，球隊周中作客紐約紅牛輸0比2後，更需要橫越大陸，喺72小時後應付喺加拿大進行嘅比賽，對奧蘭多城來說係重大考驗。奧蘭多城今仗雖有射手施利拿連抖完復出，但巴西中場卡卡將會連續第2場缺陣，加埋另一中場碧舒亞要停賽，相信作客嘅奧蘭多城今場應該凶多吉少。
機員遇作客蟲係時候反彈
其餘美職賽事方面，哥倫布機員雖然連續6場聯賽未贏過，但今仗對手華盛頓聯隊作客表現麻麻，兼且開咧後9次聯賽作客只係入得5球，今仗難望喺機員身上入到波，捧主勝。（周日早上7時30分開賽）另一場係聖荷西地震主場對FC多倫多，地震已經連續8場未贏過，球隊狀態一般，遇上近3仗取得1勝2和嘅FC多倫多，就算有主場之利都讓唔起平半，捧FC多倫多下盤抵玩。
（TVB 302周日早上10時30分直播）