教頭執位歐洲球壇刮風暴
名帥執位，歐洲球壇風暴再起！今晚多場球會季前熱身賽，焦點自然係3大頂級教頭莫連奴、干地同安察洛堤轉工後嘅第1擊：莫連奴強勢入「魔」，誓要令曼聯再次寸得起；干地上「車」激情指揮，諗盡辦法要「藍戰士」變番頂級戰車；安察洛堤征服西英意法4大聯賽，今季成「仁」自然唔想臨老燒鬚！曼聯、車路士同拜仁即將出戰國冠盃，新官上任三把火，今晚3隊踢熱身賽，即管睇吓係咪順利攞頭威！
回歸英超幫曼聯重建王朝 莫連奴首騷斬草除根
歐國盃圓滿落幕，球迷嘅焦點又去番4大聯賽！當中最多球迷關注嘅一定係英超喇，因為今季英超踏入第25個球季，李斯特城上季神奇奪標更添話題性，加埋多位世界級主帥登陸英超，嚟緊真係場場大戰呀！未開咧之前，今晚就有場曼聯作客英甲球隊韋根嘅熱身賽。雖然只係拍跳性質，但亦係「紅魔鬼」新任領隊莫連奴嘅首騷，相信一班「魔兵」為爭表現，必定夾手夾腳踢番場好波畀大家睇，曼聯1.58倍客W固然係信心之選，想好分頭2.68倍讓球客勝亦值得一試。
（周六晚8時30分開賽）
「寸王」一坐正曼聯領隊，就即刻將教練團大執位。原本莫連奴想叫傑斯留隊，不過傑斯選擇離開，莫帥惟有搵番心腹魯法利亞做佢副手。而一隊教練就搵咗前葡萄牙國腳施雲奴擔任，至於體能教練就係以往喺車路士同莫帥合作無間嘅拉連。「寸王」份人心高氣傲，上季落得畀車路士炒魷下場，條氣點會順，今季重返英超除咗要幫紅魔重建王朝，最緊要係同自己爭番啖氣！
邊緣魔兵搏命 討寸王歡心
曼聯早幾日已經開操，一班球員都表現落力，務求喺莫帥面前留下好印象，咁至有多啲上陣機會。今晚曼聯先會作客英甲仔韋根，相信落場嘅都會當正式賽事咁踢。當中有傳會被「寸王」清洗嘅桑馬達、上季畀球迷鬧爆嘅迪比，同因傷休息近10個月嘅左閘勞基梳爾，全部都要爭取表現望留隊。而萬眾期待嘅瑞典球星伊巴謙莫域，因為啱啱踢完歐國盃，所以莫連奴批咗佢假等佢休息吓先。不過就算無「呂布」坐鎮，莫連奴領軍嘅「地標戰」，班球員一定會做番場好戲畀大家睇。
英甲球隊韋根休息咗2個月後，成班球員似乎未「回魂」，早前分別同車士打及布拉加踢咗2場熱身賽，都只能夠踢成0比0，鋒力弱到不堪。今次仲要對住飢渴感十足嘅曼聯，相信都係捱打居多。再睇埋往績，曼聯近6次對韋根取得5勝1負，5場勝仗更係保持不失之下贏波，實力明顯高對手兩班，今晚客勝絕對係明智之選。