餓波咁耐 放手死砌
今晚球會熱身賽焦點，意甲勁旅羅馬迎戰俄超球隊泰歷克，今場波喺意大利平佐洛拿賓尼達體育場舉行，因此羅馬都算有主場之利。由於羅馬並非國腳大戶，大部分主力已經歸隊操練，首仗熱身賽大炒業餘球隊平索洛16比0，可見眾星並冇留力。泰歷克上月中已開操，球員狀態應該上晒力，可同羅馬鬥攻，推介大盤。
（有線64及203台周日晚11時直播）
迪斯高抖完精神飽滿
羅馬中場比真歷轉投咗祖雲達斯，艾沙拉維、迪羅斯、費奧倫斯、尼恩高蘭踢完歐國盃仍未歸隊。不過球隊人腳仍然充裕，迪斯高、穆罕默德沙拿、托迪、柏洛迪、伊度比等主力已歸隊。迪斯高上仗15分鐘內已射入4球，穆罕默德沙拿亦梅開二度，放完假之後，果然精神飽滿。事實上，羅馬以往踢熱身賽，表現進取，包括上季賽事在內，近7仗熱身賽有6仗總入球達3球或以上，加上剛開操，球員餓波已久，又冇乜壓力，應會踢得更開放。
泰歷克早開操態更佳
由於俄超7月30日就開鑼，泰歷克比較早開操，球隊早前已去過奧地利踢咗4場熱身賽，取得2勝1和1負。雖然成績麻麻，但畢竟經過近1個月操練同比賽，狀態應該喺羅馬之上，今仗去到意大利都未驚過，應會搶攻爭勝，為新球季壯聲威。