埼玉市打吡5連勝
今晚日職次階段爆發「埼玉市打吡」，由浦和紅鑽主場火併大宮松鼠。紅鑽近5次同松鼠交手全勝，擺明剋住客隊，而且紅鑽主場出擊特別醒神，連首階段在內已連贏3仗，今仗可藉地利再下一城，2倍讓球主勝值得一博。
（有線61及201周日晚6時直播）
打吡戰一向打甩髀，兩軍戰意唔需要懷疑，尤其係力爭次階段冠軍嘅紅鑽。查實紅鑽首階段曾經帶出，點知喺5月中忽然下滑，一度5仗（2和3負）不勝搞到跌落第3，將首階段冠軍拱手相讓。好在紅鑽出戰同市死敵松鼠特別有計，近5次交鋒獲得全勝，更狂轟13球僅失1球，完全係「格食格」。
紅鑽主場威力強勁，連首階段在內已錄得3連勝，其中首席射手興梠慎三今季9個士哥中，有7球係喺主場攻入。呢位射手同中場遠藤航踢埋今場就要去U23國家隊報到，之後起碼5場唔使預佢哋，紅鑽今場肯定搶得就搶。
紅鑽推門票優惠吸引fans
同時，紅鑽對呢場打吡戰極為重視，球會特別加推門票優惠，無論係指定席定企位，中小學生門票一律只售550日圓，18歲以下嘅球迷即場入會，仲可以年費打五折，只收500日圓，務求吸引fans們一家大細親臨打氣，現時超過5萬波飛都已沽清，可以預期到時紅鑽主場——埼玉2002體育場會係一片「紅海」。
另一邊廂，松鼠實力稍遜之餘，亦都唔擅長作客比賽，連首階段在內近3仗客場未贏過，又有大腦家長昭博養傷，今次造訪「剋星」仲要畀一大班敵對球迷「開汽水」，隨時未踢先腳軟，紅鑽讓球主勝必捧。