林柏特帶頭開火
周一清晨上演東岸前列大戰，由「阿四」蒙特利爾衝擊主場火併「一哥」紐約城。雖然「魔獸」杜奧巴未必能夠趕及披甲，但衝擊火力依然未減，特別係主場出擊分外好火，近3仗總入球至少有3粒，撞正紐約城中場老將林柏特近5仗入4球，今仗似係鬥攻格局，入球大（2.5球）更值博。
（TVB 302周一清晨5時直播）
衝擊缺魔獸靠皮亞迪數胡
雖然杜奧巴一直係蒙特利爾衝擊數胡人物，但「魔獸」狀態時好時壞，近期更頻頻受傷，好彩其他隊友如米高沙拉薩、皮亞迪及安迪維路，亦能分擔入球重任。單計近2仗聯賽主場，三人便包辦球隊5粒入球，連同杜奧巴受傷前有份出戰嘅聯賽以3比2勝銀河之役，皮亞迪及安迪維路各建一功，衝擊連續3仗聯賽主場總入球達3球或以上，查實未計今輪，皮亞迪以10球排喺射手榜次席，就算「魔獸」缺陣對攻擊力亦冇乜大影響。
另一邊廂，由法國名宿韋拉帶隊的東岸「一哥」紐約城，坐擁派路、韋拿及林柏特等歐洲球星，實力強勁。原本諗住「林伯」同杜奧巴今仗嚟個車路士舊隊友內訌，但「魔獸」未知趕唔趕得切復出，不過「林伯」近排弗到漏油，近5仗聯賽更攻入4球，腳風順到冇朋友，隊友韋拿亦以12球位列射手榜「一哥」，火力全開唔係人咁品，加上上仗意外地以1比3輸畀肯薩斯體育會，今仗梗係想贏波反彈，作客一於照攻，隨時合演入球騷，大盤咪錯過。