王健林擬收購 西布朗大展拳腳
今晚由荷甲維迪斯主場對英超西布朗嘅球會熱身賽充滿「中國打吡」味道，事關維迪斯擁有中國超新星張玉寧助陣，呢位19歲射手上季荷甲季尾一鳴驚人，踏入暑期愈戰愈勇，近3仗熱身賽都有波入，銳不可當。至於西布朗獲中國富豪王健林垂青，準備收購入主，今仗當然要做齣好戲，以抬高價錢。預料雙方豁出去鬥攻，Mic少首選入球大。（周五凌晨零時30分開賽）
張玉寧上年7月由中超球隊ＦＣ杭州（杭州綠城）加盟荷甲球隊維迪斯，初時冇乜人睇好，佢亦等到今年2月先至首次為維迪斯上陣，其後對洛達及川迪均取得入球，表現令人驚喜。維迪斯開操後3場熱身賽，張玉寧更成為主角，3仗都有波入，協助球隊取得2勝1負。最難得係呢位新星拒絕中超富豪球會天價薪酬引誘，決定繼續留效維迪斯，希望喺歐洲球壇闖出名堂，決心十足。因此，張玉寧肯定會付出更大努力爭取正選位置，就算踢熱身賽，都會搏老命爭取入波。
踢好波提升叫價
至於西布朗近年積極拓展中國市場，並獲得主攻中國等亞洲地區嘅網上博彩公司同樂城贊助，球會並透過微博、微信等中國社交平台，吸引內地球迷支持。近期有傳中國富豪王健林打算用1.5億鎊收購西布朗，睇嚟呢間英超球會加入中資陣營只係時間問題。西布朗如果想交易水到渠成，最直接方法就係踢好波，佢哋早前鬥巴黎聖日耳門都可以先開紀錄，以西布朗實力，相信要攻破維迪斯大門應不成問題。