國冠盃歐美賽區賽事展開，蘇超冠軍些路迪今晚主場迎戰英超盟主李斯特城。雖然兩隊都係冠軍級球隊，不過蘇超水平遠遜英超，些路迪過去對住英超球隊9成輸波，今仗對住有馬列斯、真禾等等球星領軍嘅「狐狸」難免被睇低，客勝值得支持。
（有線61及201台周日凌晨零時30分直播）
些路迪今季由前利物浦領隊羅渣士擔任領隊，不過磨合似乎仲有漫漫長路，雖然球隊啱啱喺歐聯外圍賽晉級，但對住直布羅陀嘅半業餘球隊林肯紅魔鬼都要先輸波，周中次回合先至反勝出線，表現絕對難令球迷滿意。唔好忘記，些路迪下周又要踢歐聯第3圈賽事，為保留實力今仗唔會去盡，戰力自然再打折扣。
狐狸增兵後人腳強勁
作客嘅「狐狸」李斯特城有法國中場尼高路簡迪離隊，但領隊雲尼亞里已經補入法國中場南柏斯文迪、尼日利亞前鋒阿密特穆沙、西班牙守將路爾斯靴南迪斯同德國門將薛拿，後3者喺上仗友賽2:1反勝牛津聯都有落場，狀態唔錯。李斯特城今仗除咗占美華迪同左閘基斯甸富治斯未歸隊，以馬列斯為首嘅冠軍功臣都在陣，實力強勁。
值得一提嘅係，些路迪貴為蘇超班霸，但係近11次對住英超球隊戰績慘淡，錄得1勝10負嘅羞家成績，就連對住已經降班嘅狼隊、布力般流浪都輸波，今次迎戰上季英超冠軍李斯特城更難逞強。