日職重頭戲，鹿島鹿角主場對浦和紅鑽，兩軍受「奧運病毒」侵襲，當中以浦和紅鑽「病情」最嚴重，射手興梠慎三及後衞遠藤航入選日本奧運足球隊，無緣今仗聯賽，加上中場宇賀神友彌停賽，前中後3線都有主力缺陣，受讓都冇着數。鹿島鹿角讓平半，捧上盤。
（有線62及202台周六下午5時30分直播）
鹿島鹿角有後衞植田直通同門將櫛引政敏入選日本奧足而缺陣，但櫛引政敏只屬後備，影響比較細。最重要係中村充孝仍在陣，呢位前鋒狀態大勇，近4場日職射入3球，協助鹿島鹿角近3場聯賽轟入10球，火力非常強大。正所謂進攻就係最好嘅防守，相信鹿島鹿角可以壓住對手來攻，防線唔會受太大壓力，足以彌補植田直通缺陣嘅影響。
「奧運病毒」侵襲缺3主力
反觀，浦和紅鑽少咗3位主將，打擊就非常大，特別係前鋒興梠慎三，屬於球隊首席射手，包括首階段聯賽在內，佢為紅鑽轟入10球。日本奧足今次徵召呢位29歲日本大國腳，作為超齡球員參加奧運，就知佢有幾舉足輕重。浦和紅鑽鋒線失去一把利刀，防線又冇埋遠藤航，攻守能力都受削弱，形勢認真危危乎。浦和紅鑽排名及近績都比鹿島鹿角為佳，偏偏今仗有得受讓，就知有景轟，小心中伏。