國際冠軍球會盃全面開戰！澳洲賽區今午拉開戰幔，頭炮有意甲班霸祖雲達斯作客墨爾本勝利。祖雲達斯今次未能「夫添」出戰，不過中前場仍有保羅戴巴拿、比真歷等好波之人，火力唔弱，東道主墨爾本勝利亦會趁祖記後防不整，主動出擊博偷雞，捧入球大應該冇走雞。
（有線61及201台周六下午5時直播）
祖雲達斯貴為意甲冠軍，陣中球星多到數唔晒，雖然文迪蘇傑、施蒙尼沙薩、保羅普巴等踢歐國盃球星冇隨隊，不過單係上季意甲入19嘅阿根廷射手保羅戴巴拿壓陣，士哥已經唔使憂，何況新加盟嘅波斯尼亞中場比真歷亦會亮相，呢位死球專家隨時都可以用重炮破門，唔講得笑。
祖記防線面目全非
不過，祖記今仗後防一眾意大利國腳包括基亞連尼、巴沙利、邦路斯同門將保方，左右兩閘艾拉、列治史迪拿以及另一新兵丹尼爾都未歸隊，拉雜成軍嘅防線可唔可以保住清白身，真係好令球迷懷疑。墨爾本勝利陣中有貝利沙、賓卡法拿等出色射手，鋒力一樣唔可以睇小，隨時可以喺祖記身上搵到食。祖雲達斯2年前出訪亞洲，3仗比賽合共炮製19個入球，對住印尼明星隊、澳職明星隊都有失波，相信今場又會係大手交易。