哥帥兵法食住寸王
國冠盃上演「曼市打吡」，曼城同曼聯喺北京鳥巢體育場對決，焦點肯定係雙方新帥哥迪奧拿同莫連奴，兩人由以往歐聯、西甲，再鬥到來季英超，真係有緣。呢對球壇經典歡喜冤家，每次碰面都成為熱話，但講戰績哥帥佔上風，佢過去16次同「寸王」交手，取得7勝7和2負，加上曼城多位國腳已歸隊，人腳齊整有力降「魔」，捧曼城主勝。
（有線61、64、201及203台周一晚7時30分直播）
哥迪奧拿征服西甲及德甲後，下一個目標直指英超寶座，由死敵莫連奴領軍嘅曼聯，自然係爭標路上一大絆腳石。不過哥帥對付「寸王」非常有心得，以往執教巴塞隆拿及拜仁慕尼黑，對住由莫連奴率領嘅國際米蘭、皇家馬德里、車路士，經常佔上風。單計法定時間，兩人16次交鋒，哥迪奧拿獲得7勝7和2負，包括2010年11月西甲，為巴塞大炒皇馬5比0。由此可見，哥帥慣用嘅調控球在腳戰術，多數食住「寸王」擅長嘅反擊戰術。
紅魔冇態唔易捱
曼城今仗另一優勢係阿古路、大衞施華等國腳已經歸隊，大軍名單多達34人，比曼聯多9人調配，哥迪奧拿今仗排陣方面，有大把選擇，相信表現會比上仗0比1不敵拜仁慕尼黑有所改善。
「紅魔鬼」曼聯上周五國冠盃1比4慘敗於多蒙特腳下，賽後莫連奴承認球員狀態不足，短短相隔3日就要硬撼曼城，以紅魔低迷狀態加上炎熱天氣，恐怕球員體力吃不消。值得一提，莫連奴喺2009年夏天曾率領國際米蘭，造訪今仗比賽場地鳥巢出戰意超盃，竟然爆冷以1比2不敵實力一般嘅拉素，似乎鳥巢唔多利佢，捧曼城主勝為妙。