BBC未歸隊比真歷登場孭飛
今日國冠盃澳洲賽區有好戲碼，祖雲達斯同熱刺喺墨爾本交鋒，祖記上仗射輸12碼不敵澳職球隊墨爾本勝利，認真失威。不過佢哋仲有兩位高質新兵比真歷及貝拿迪亞未登場，預計今仗會披甲上陣。熱刺雖然缺少哈利卡尼、迪利阿里等出戰歐國盃嘅球員，但仲有孫興民、拉美拿等進攻好手，熱捧入球大。
（有線61、64、201及203台周二晚6時直播）
祖雲達斯鋼門保方、防線「BBC」邦路斯、巴沙利、基亞連尼尚未歸隊，所以唔好再用傳統意式穩健防守衡量呢支「老婦人」。事實上，正因為祖記後防用晒二線兵同小將，結果上仗對實力麻麻嘅墨爾本勝利都要失波。不過，祖雲達斯中前場人腳亦唔差，就算缺少文迪蘇傑同保羅普巴，仲有上季意甲射入19球嘅保羅戴巴拿，另一位巴西中場靴蘭尼斯亦係一隊常規主將。
貝拿迪亞助攻一流
當然，今仗最令人期待係早前由羅馬加盟嘅比真歷，呢位波斯尼亞國腳上季聯賽轟入10球，以一位中場球員嚟講相當難得，皆因比真歷係「罰球專家」，有罰球就係叫胡時候。比真歷上仗喺磨合時期冇份踢，預料教練阿里基今仗會畀機會佢一騷哥利。至於由拜仁慕尼黑來投嘅中堅貝拿迪亞助攻力強，上季德甲開鑼戰即為拜仁入波，今場隨時又有驚喜。值得一提祖記踢埋今場就會訪港，準備同傑志進行熱身賽。
另一邊廂，今場係熱刺開操後首場熱身賽，經過一輪休息，熱刺眾將狀態成迷，但人腳始終有一定質素，特別係射手孫興民有傳統南韓球員勤奮美德，踢熱身賽都唔會「揸流攤」，中場球星拉美拿、基斯甸艾歷臣後上埋門好有威脅，兩人上季英超共入11球，對住祖記殘缺防線，應該有斬獲。