另一場國冠盃歐美賽區大戰，皇家馬德里同巴黎聖日耳門（PSG）喺美國哥倫布俄亥俄對決。兩大豪門以往交鋒雷聲大雨點小，近4次碰面竟然只有3個入球，而且皇馬「BBC」鋒線缺少C朗同加里夫巴利，加上今仗係開操後首場季前熱身賽，狀態令人懷疑。聖日耳門過去4次鬥皇馬，都入唔到波，明顯被對手食住，中位數2.5/3球，揀入球細。
（有線61、201台周四早上7時30分直播）
施丹囝囝有望落場
皇馬今次出戰戰國冠盃大軍名單，雖有前鋒賓施馬、中場卡斯美路、艾斯高、後衞馬些路、華拉尼等熟悉名字壓陣，兩名西班牙國腳艾華路莫拉達、盧卡斯華斯基斯亦已經歸隊。不過，兩大巨星C朗、加里夫巴利仲放緊假，中場大腦卻奧斯、莫迪歷，中堅比比都未歸隊，實力難免大打折扣。教練施丹甚至帶埋兩位囝囝隨隊，以備不時之需，加上會長皮里茲要求佢派較多年輕球員落場，試陣味濃，不宜高估。
聖日耳門近4對賽零入球
巴黎聖日耳門上仗國冠盃以3比1擊敗國際米蘭，阿根廷國腳迪馬利亞已歸隊備戰，但今仗未必有足夠狀態倒戈，而且PSG因為射手伊巴謙莫域轉投曼聯，新進攻體系仍在摸索階段，要喺皇馬身上入波，有一定難度。
事實上，PSG過去4次鬥皇馬，竟然全部都入唔到波，包括上屆歐聯分組賽主場打和0比0，作客輸0比1，另外有兩場熱身賽，PSG都係以0比1落敗，可見兩隊屬於格食格，PSG想破宿命並唔容易。