近年愈吸愈多星嘅美職，聽朝舉行一年一度嘅明星賽，美職明星隊會喺聖荷西迎戰英超勁旅「兵工廠」阿仙奴。美職明星隊陣容星光熠熠，杜奧巴、韋拿、派路、卡卡、基奧雲高等球星壓陣，戰鬥力強勁，相反阿仙奴陣容極殘，中堅梅迪薩卡賽前更爆出重傷消息，美職明星隊有力打落水狗，主Win值博！
（TVB 302周五早上７時30分直播）
美職明星隊對上2年面對歐洲勁旅，分別擊敗拜仁慕尼黑同熱刺，證明球隊實力同決心兼備。一如過往兩年，美職明星隊今屆精銳盡出，杜奧巴、基奧雲高、韋拿、杜斯山度士、派路同卡卡壓陣，加上丹普西、雲度路斯基、鍾斯同碧卡文等一眾美國現役國腳，絕對夠睇頭。
阿仙奴英超開鑼缺10星
另邊廂，阿仙奴陣容天殘地缺，阿歷斯山齊士、基奧特、奧斯爾、艾朗藍斯、哥斯尼等常規主力未歸隊，德國中堅梅迪薩卡亦膝傷要抖5個月，加埋長期傷兵韋碧克同贊堅臣，以及要踢奧運嘅基拿比同淺野拓磨，「兵工廠」呢10星連英超開咧都踢唔到。更何況阿仙奴球員狀態明顯未操起，日前友賽法乙朗斯都係和波，今仗造訪美職明星隊，恐怕難逃一敗。