F1鬥F3 重施降魔技
國冠盃「中國站」壓軸戰，多蒙特同曼城喺深圳大運體育中心球場對壘，「蜜蜂兵團」多蒙特上仗可以大炒曼聯4比1，皆因狀態贏晒，畢竟呢支德甲勁旅已開操近1個月，至今踢咗5場熱身賽，球員已上晒力。反觀，曼城同紅魔鬼情況相似，開操時間比較短，多位主力剛歸隊，恐怕未準備好應付強敵，隨時步曼聯後塵，捧多蒙特主勝。
（有線61、64、201、203台周四晚7時30分直播）
多蒙特由月初已開始踢熱身賽，至今5戰有4勝1和，上仗贏紅魔鬼，連對方領隊莫連奴都承認曼聯狀態遠不及「蜜蜂兵團」，似「F3」鬥「F1」。多蒙特除咗較早開操備戰，已谷起狀態之外，奧巴美揚、香川真司、卡斯特羅、舒姆沙等多位主力，今夏冇國際賽任務，一早歸隊亦有助教練杜曹進行完整季前準備工作，基本上多蒙特已可進入「實戰階段」，迎接新球季。
雖然多蒙特出售中場米希達利恩畀曼聯，但新加盟嘅球員奧士文尼迪比利、施巴斯坦洛迪表現對辦，法國19歲小將奧士文尼迪比利上仗鬥曼聯，更取得入球。因此，就算另外兩位新兵馬里奧葛斯、舒賀爾尼未歸隊，都仍然夠殺。
曼城主力剛歸隊未Ready
曼城原定周一喺北京鳥巢對曼聯嘅國冠盃，因為球場草場惡劣而取消，換言之「藍月亮」開操後，只踢過1場熱身賽，就係0比1不敵拜仁慕尼黑。雖然阿古路、大衞施華、赫特等大部分國腳已歸隊，但呢班球星畢竟為國家隊搏咗一輪，啱啱放完假，唔好期望今仗會發揮太大作用。
值得一提，多蒙特教練杜曹同曼城領隊哥迪奧拿之前喺德甲多次交鋒，彼此熟悉對方戰術，兩人近兩次交手，法定時間都打和。不過哥帥始終剛執教曼城，球員未必適應佢嘅戰術，踢起上來或事倍功半，再鬥杜曹，難免處於劣勢，捧多蒙特為佳。