比甲開鑼布魯日靠赫搶頭胡
新一季比利時甲組聯賽今晚開鑼，揭幕戰由梅赫倫喺主場對布魯日，布魯日上季喺有料教頭普荷美帶領下結束11年等待，重奪聯賽錦標。今季季前準備工夫做得積極，上周末仲喺比超盃人少打人多下反勝標準列治先聲奪人，今晚作客面對持續放血嘅梅赫倫，有力打響聯賽頭炮，推介布魯日讓半一嘅上盤。
（周六凌晨2時30分開賽）
布魯日近年無論喺財力同管理方面，已經畀宿敵安德列治拋離，上季能夠贏得聯賽冠軍，感染力強嘅普荷美功不可沒。布魯日今夏失去咗頭號球星，比利時國家隊右閘蒙尼亞以700萬歐元轉會費，轉投法甲豪門巴黎聖日耳門。普荷美就用呢筆錢引入咗3名中後場球員，雖然名氣唔大，但都有西甲同荷甲經驗，而且全部都十分年輕，補充咗球隊兵源同活力。總結佢哋今夏喺轉會市場上只係收支平衡，零投入之下能否再次壓倒已花過千萬歐元擴軍嘅安德列治，就要睇普荷美功力。
布魯日今夏備戰工作開展得早，經過連場高強度熱身賽，上周末比超盃喺上半場先落後一球，兼有中場大將雲拿根被逐嘅劣勢下，易邊後連入兩球反勝標準列治捧盃，足見球員上力甚速。
梅赫倫持續星散唔夠揪
另一邊廂，主隊梅赫倫係典型小球會，現時球員總身價只係布魯日嘅五分之一，每季都靠賣走上位球員生存，上季中以後已見頻頻放血，佢哋上季只排聯賽常規賽第10，去到歐霸附加賽仲因為星散而喺分組賽出局。今季賣血情況持續，陣中兩名最重要中場主力齊齊他投，防守中場伊巴希馬施斯加盟標準列治，阿爾及利亞進攻中場蘇菲亞漢尼就去咗安德列治，球隊又冇錢作相應補充，實力進一步削弱。梅赫倫上季兩遇布魯日，無論主客都淨輸3球，今仗睇怕都好難轉弱為強。