馬體會開火大發神威
熱刺B隊防線頂唔順
國冠盃澳洲站今日繼續有好戲上演，熱刺同馬德里體育會喺墨爾本對壘。熱刺缺少多位國腳之下，上仗1比2不敵祖雲達斯，但經過惡鬥後，熱刺球員應該開始醒神，力爭打開勝利之門。至於馬體會今次之行亦有射手基沙文缺陣，但陣中仲有費蘭度托利斯、基比、高甸等主力，質素有保證，加上賽事始終包含熱身表演成分，相信雙方唔介意鬥攻娛賓，Mic少推介入球大。
（有線61、64、201、203台周五晚6時直播）
熱刺嘅法國鋼門洛里斯、兩位比利時中堅維頓漢、艾達韋列特，左右二閘基爾獲加、丹尼路斯，都因為踢完歐國盃放假未歸隊，因此上仗鬥祖記，整條防線面目全非，結果開波僅14分鐘就連失兩粒。由於領隊普捷天奴現時手上後防人腳選擇有限，今仗惟有繼續用「B隊」防線應戰，遇上火力強勁嘅馬體會，恐怕難保清白之身。
「新雲佬」雲遜贊臣有料到
不過，熱刺中前場人腳相當不俗，就算缺少王牌射手哈利卡尼，但仲有查迪利、孫興民、拉美拿，以新加盟嘅荷蘭射手雲遜贊臣助陣。22歲嘅雲遜贊臣於上季荷甲聯賽射入27球，獲得神射手殊榮，被外界一致睇好可以成為另一位雲尼斯達萊，值得留意。熱刺入波能力十足，今仗隨時以攻代守。
馬體會陣中出戰歐國盃嘅國腳人數唔多，所以今次澳洲之旅，陣容比較齊整，最大損失係法國射手基沙文未歸隊。不過，費蘭度托利斯上季表現回勇，並已獲得續約，證明佢寶刀未老，當然要以行動報答母會。中場新星沙奧尼古斯亦有隨隊，佢上屆歐聯4強個人表演射死拜仁慕尼黑，盡顯功架，今場一定把握機會騷哥利。馬體會要喺殘陣嘅熱刺防線身上取得入球並唔困難，一於要入球大。