國冠盃今晚有場星級大戰，由皇家馬德里於美國密歇根州鬥車路士，皇馬近年專剋英超球隊，近9次對英超球隊拎到7勝1和1負佳績，似乎對「獵英」特別有心得。車路士今季喺新帥干地接手後仍處於適應期，中場法比加斯仲要停賽，今仗畀唔到球迷信心，一於捧皇馬Ｗ。
（有線61及201台周日凌晨3時直播）
皇馬上仗國冠盃輸畀巴黎聖日耳門，雖然兩大王牌C朗、加里夫巴利連同卻奧斯、莫迪歷、比比等主力未歸隊，但三線仲有賓施馬、馬些路、基羅拿華斯等常規主力候命，仍有一定戰鬥力。而且經過上仗熱身後，今仗狀態應該提升唔少，最重要係皇馬近年面對英超球隊贏多輸少，包括上屆國冠盃澳洲賽區4比1炒曼城。皇馬對上3年參加國冠盃，先後於2013年及去年澳洲賽區及中國賽區封王，爭盃決心十足。
車路士上仗國冠盃1比0小勝利物浦，成班球員踢得好火，法比加斯仲失控惡意侵犯對手食紅牌，搞到今仗要停賽。車仔上仗排出強陣搏殺，付出咗唔少體力，今仗戰鬥力勢必下降，再加上車路士過往出戰國冠盃表現平平，上屆4仗於法定時間未嘗一勝，面對實力次一級嘅美職球隊紐約紅牛同意甲費倫天拿都輸波，今仗唔多樂觀。