阿仙奴嘅美國之旅聽朝踢第2場比賽，喺洛杉磯同墨超勁旅瓜達拉哈拉交鋒，「兵工廠」上仗2比1險勝美職明星隊，新兵格列沙加首演對辦，前場一班小將亦鬥志十足，不過防線天殘地缺始終令人擔心，今仗似乎會係大手交易，入球大值博。
（周一早上9時開賽）
上仗擊敗美職明星隊，阿仙奴嘅瑞士中場格列沙加首演只係踢半場，已經有兩腳遠射非常到肉，如無意外今仗會正選上陣，同上仗冇份落場嘅辛迪卡索拉合作，創造力同後上攻門都有睇頭。上仗貢獻絕殺嘅英格蘭U21前鋒艾卡邦依家信心爆棚，有力繼續數胡。
瓜達拉哈拉鋒力唔差
不過，「兵工廠」後防人腳極殘，法國國腳哥斯尼未歸隊，梅迪薩卡同基比爾包列斯達受傷冇嚟美國，上仗用波蘭小將基斯甸比歷客串中堅，所失一球就係佢交失波出事。瓜達拉哈拉陣中有艾拔圖彭拿、奧拜連派尼達等墨西哥好波國腳，攻擊力唔弱，但佢哋啱啱喺墨超春輸0比4，防線同樣唔多掂囉！