3箭齊發 燕豪芬爭盃搶頭彩
新一季荷甲下周先開鑼，今晚就率先上演荷蘭超級盃「預熱」，由兩大傳統勁隊燕豪芬同飛燕諾喺中立場阿姆斯特丹球場爭攞頭彩。上季聯賽冠軍燕豪芬近4次與飛燕諾交手贏咗3場，相信佢哋可以成功「冧莊」再奪荷超盃，1.87倍客W好路。
（周日凌晨零時開賽）
燕豪芬喺7月份踢咗7場熱身賽，錄得5勝2負，雖然上場意外輸畀乙組仔FC燕豪芬0比1，但或多或少因留力爭盃所致，參考價值不大。今戰燕豪芬3把尖刀盧克迪莊、盧斯安奴拿辛格同約翰盧卡迪亞預計會正選上陣，中場主力阿當馬靴及古亞達度亦可候命，加上近4次對飛燕諾贏咗3次，最近一次作客都贏到波，就算喺中立場踢都唔係問題。
飛燕諾近4場熱身賽全勝，但對手實力一般，最叻只係華倫西亞，返到荷蘭撞正老對手燕豪芬，恐怕仲惡踢，應難阻燕豪芬衞冕超級盃。
美職銀河唔赦海灣者
另邊廂美職今日有9場比賽，其中西雅圖海灣者主場對洛杉磯銀河，海灣者近7場聯賽只得1勝，仲炒埋教練舒密特，讓唔起聯賽4連勝嘅銀河，銀河讓球客勝好穩陣。另外FC多倫多主場對哥倫布機員，主隊當家球星基奧雲高Fit到爆喺上場連中三元，加上射手艾迪杜里復出，要打殘7場聯賽都未贏過的哥倫布機員易過借火，主W值博。